呃得透


女兒架萬事得了十年,我跟她說應該換車了,美國最權威刊物《消費者報告》說:德國福士的「歌芙」被車主們評定為最佳汽車。就換部「歌芙」吧!女兒說:我不會換福士汽車,因為我不喜歡。這是父女十天前的對話,女大女世界,車是她用的,當然無話可說。誰知十日後的今日俾佢瘀到爆:「老竇,好彩冇聽你指,日叫我去買福士,死囉,如果新車落地,立即變爛茶渣,送俾人都冇人要,你係唔係賠返錢俾我先?」嘩,真係好彩,一時衰多口,竟然一語成讖,睇怕要搵地窿捐,仲要掏荷包幫佢善後,當場冷汗直流,險過剃頭。

從來都是德國製品的忠實擁躉,德國車自然愛之入骨,德國刀之鋒利,那手起刀落的快意實在無法形容,試過一對德國皮鞋著極都唔識得爛,德國實在令人肅然起敬。唉,竟然,竟然德國人可以超級無恥咁去騙人,騙透全世界二千幾萬車主,用騙術去向大氣放毒,幾許不吸煙、不飲酒的人無辜死於肺癌。係,德國佬仲有好多衰人,希特拉真係衰到絕頂,搞鑊第二次世界大戰真係慘不忍睹,連貝多芬都歡樂唔起。除希特拉仲有一個害盡天下蒼生,比希特拉衰多萬倍德國佬,佢就係馬克思,坐間屋度閉門造車,搞出共產主義荒謬,令全世界死人多過第二次世界大戰的幾倍,受害時間長達幾十年,民窮財盡,有口無言,淚在心裏流都係受者常態,原來呃人最叻係德國佬。