董培新:弱小強國


一個星期以來好鬼唔得閒,世界盃開鑼,就算唔係標準足球迷,鋪天蓋地傳來的信息,無論走到任何一個角落,人們掛在口邊的話題都是世界盃。報紙、雜誌,電台、電視台新聞報告都圍繞世界盃,全人類都被世界盃這盛事密密包圍,要逃也逃不了。只是奇怪,全世界最強大的兩個超級大國,美國和中國都無緣競賽,美國還好一點,隻腳曾經踩過入比賽球場。可憐偉大的中國,連世界盃的味道都聞唔到,真陰功。一些有識之士還落井下石寫包單,話我國一百年內都入唔到世界盃。豈有此理,真係太過分了,長別人志氣,滅自己威風,簡直就係叛國,散佈這謠言者應判處重刑。

有時有啲嘢真係諗極都諗唔明,我哋中國人從來都係聰明絕頂,踢波有幾難啫,國人將個波交俾你係閒常事啦,你接咗個波又卸咗過隔籬係易過借火嘅嘢,全國裏面精於此道嘅人真係多到無倫。仲有,我哋國人搏得、拚得、剷得、撞得、矛得、卸得、衰得、狂得,呢啲種種優點,冇理由响綠茵場上就唔得,只有一個可能,就係球場上嘅球例太過過時,太過死板,搞到空有一身功夫都無用武之地。咁點解美國足球又唔得呀?佢哋點都仲係全球最發達國家噃。嗱,美國冇錯係又發達、又先進,但係又俾足球球例綁死佢。如果足球球例由美國佬訂落嚟,美國隊唔止可以打到入圍,直情冇人敢同佢哋爭霸,講笑?冇講笑,美國人個個都有槍,足球員可以帶槍落場,好似西部牛仔咁,你話世界盃係唔係攞硬?

90tps

董培新世界盃足球美國中國