【起晒雞皮】側田偶遇巨聲幫陳康健 街頭合唱〈三十日〉


untitled-collage-12

第一代巨聲幫陳康健(Oil)有港版曹格之稱,佢自從搬咗去赤柱休養之後,就時不時落街玩Busking止止歌癮。近日佢照舊帶齊結他同Mic Stand落街唱〈三十日〉就巧遇上靚聲王側田,抱住愛犬嘅Justi聽到Oil唱得咁好聽,仲忍唔住上前一齊合唱添。

從片段可見,側田喺街見到陳康健Buksing緊就企埋一邊慢慢聽,當聽到Oil唱佢首金曲〈三十日〉就舉起姆指讚好,然後仲行埋去同佢一齊唱番兩句。側田自上年年尾開完演唱會之後就冇出新歌,而呢段時間仲冇咩喺公開場合唱歌,所以各位側田粉絲一睇見佢上傳唱歌片就紛紛讚好,同時仲讚埋巨聲幫嘅陳康健唱得唔錯,同原唱一樣聽到佢哋起晒雞皮。

陳康健喺《誇世代》客串做街頭藝人

講開又講,《超級巨聲》出身嘅陳康健咁多年嚟都一心想做歌手,可惜同無綫簽約之後一直都未有太多機會發揮專長,去年的幕前演出有《我瞞結婚了》飾演李耀,同埋喺《誇世代》入面客串做街頭藝人。而去年Oil喺生活上更經歷巨變,先後與拍拖多年的女朋友分手、患病等等,繼而決定搬入赤柱休養身體。雖然人生中遇上不少困難,但係佢仍然冇放棄唱歌夢,仲身兼唱歌老師、演員多職維持生計。

untitled-collage-13

最後,筆者希望陳康健千祈唔好放棄自己嘅夢想,因為同樣喺巨聲幫出身嘅胡鴻鈞都係捱咗好幾年先憑《降魔的》入屋彈起,所以你都要加油啊!

圖片來源:陳康健@Facebook

影片來源:側田@Facebook,my TV SUPER(www.mytvsuper.com)

三十日巨聲幫陳康健側田busking赤柱
上一篇 下一篇