【舉動矚目】木村光希自爆家姐做私人攝影師 為學業只拍廣告唔接演藝工作


koki03

木村拓哉嘅15歲二女光希(Koki)近期以最強星二代姿態出道日本模特兒界,昨晚深夜佢又再喺Instagram放新相,仲留言自爆係由家姐木村心美做佢私人攝影師,可見兩姊妹關係甚好。雖然木村同靜香批準光希做model,但原來佢唔會接演藝工作,主要以學業優先,除咗繼續作曲,會做下模特兒拍下廣告,聞說已有10個廣告合約offer。

光希最近開Instagram,其追隨嘅粉絲人數已超過77萬,相信好快大破百萬大關。光希相隔一個星期終於喺香港時間周日深夜更新Ig,上載咗喺紫陽花前拍攝的大頭側面靚相,盡展標緻輪廓,佢仲用英文留言:「My sister is my personal cameraman.」佢話家姐心美係佢私人攝影師,即係話呢張相係由家姐操刀,兩姊妹感情好好,而張相亦火速大破12萬個like。

據日本傳媒報道,光希雖然簽咗媽咪工藤靜香嘅公司做Model界超級新星,但佢仍然會以學業優先,唔會出道日本藝能界,即係唔會接拍日劇或電影亦唔會出唱片,但會繼續作曲,擔任時裝雜誌模特兒同拍攝廣告。

有日本雜誌記者收到風,光希已吸引到10個廣告合約offer,由於SMAP同木村拓哉喺內地好出名,所以都有內地廣告商好想搵心美拍廣告。

撰文:安東尼奧

圖片來源:Instagram

木村拓哉木村光希Koki木村心美工藤靜香SMAP