【原唱與翻唱】小背心許靖韻挑戰Eason《K歌之王》 原唱最經典


「誰人又相信一世一生這膚淺對白,來吧送給你叫幾百萬人流淚過的歌……」相信每一個人聽到呢兩句,腦海中自然會浮現《K歌之王》呢首歌。《K歌之王》係陳奕迅2000年推出嘅經典金曲,巧妙咁將33首流行情歌元素放喺裹面,除咗有音樂性之餘,演繹情感上都好似坐過山車咁高低起伏,所以要翻唱呢首歌,絕對唔容易!

陳奕迅嘅原唱版本,感情表達得好豐富同真實,而且好有味道,好似訴說緊自身嘅故事:當K歌者使盡渾身解數,力竭聲沙咁唱盡百千情歌,對象竟然只回佢一個呵欠,仲安上「K歌之王」嘅稱號,呢種徒勞嘅孤獨、無奈感覺,陳奕迅絕對能夠表達出來。就連作曲人陳輝陽都曾經講過:「過往好多人都試過翻唱,可惜從未有人可以超越陳奕迅嘅版本,因為呢首歌真係好難唱,唔係人人都駕馭得嚟。」
而《K歌之王》曾經被「小背心」許靖韻、李克勤同胡杏兒翻唱過,事實上係咪真係不及Eason嘅原唱版本呢?依家就同大家做個翻唱版本大比拼!

「小背心」許靖韻參加《創造101》時,曾經翻唱《K歌之王》驚艷全場,早前喺Youtube亦上載咗新編曲嘅翻唱版本。Angela聲線好細膩,而且好有唱功底蘊,唱嘅時候投入咗十二分感情,所以唱得好細膩,表達出愛中失意嗰種孤獨、無奈感覺。

李克勤曾經喺2001年〈港樂.克勤 LIVE〉演唱會,同香港管弦樂團合作演繹《K歌之王》呢首歌,李克勤無論聲線定歌唱技巧,都展現出好精緻、純熟同華美嘅感覺,連咬字同音嘅處理都好完美。管弦樂團華麗嘅配樂將呢首孤寂感覺嘅歌,再提升了一個層次。

胡杏兒喺2016年北京衛視節目《跨界歌王》中,藉呢首《K歌之王》嚟表達自己每場都特別認真唱歌。胡杏兒開嗓時候好淡定,中音柔美、低音沉厚,展示出佢極寬嘅音域,而且唱得好深情,感情真摯,但似乎唱得有少少緊,並無放鬆喉嚨放聲唱。

圖片來源:互聯網

影片來源:英皇娛樂 eeg music、愛奇藝、環球唱片

原唱與翻唱小背心許靖韻K歌之王陳奕迅李克勤胡杏兒Eason